Jam 5 | MYW | STEP | Kunages agulivan guyawaw yakamiy, kadiloka bukuva̱lams avakaein peinan mouvit singaya bukulivatus.

James 5

Guyawaw sinapun

1 Kunages agulivan guyawaw yakamiy, kadiloka bukuva̱lams avakaein peinan mouvit singaya bukulivatus.

2 Miwliyoug babaw bipsa̱pwas; man bikaboulis amikweim; mimoney bipwapop peinan kwayuses; anpwapop bimlavag mamagina pa̱nous, biggob woumiy, nakabiyokous tut waseg, peinan singay babaw kwayuses.

4 Mayses tasiyas tawteleins mibag bo kwayuses, igaw nises wamibunatum. Money towen iwkuwak. Aygan bo iligen Tatawtoun Yowbad; mapuna bikatimop amisinap kalbaleb nukuvva̱ges.

5 Nukumwa̱saws ven watinow waseg, nukukwamkwams mamagina misagal yam babaw waseg.

6 Nukuyateles tasiyas toubweins mo nukuweiys. Nag ikatimapus amilivan. Makava nukuybilebes. E, Yowbad bikatimop amisinap guyawaw yakamiy.

Kukwapatuls o kuninitougs Yowbad waseg

7 Sigwey, kadiloka kwaptuleimiy, kusesus-wan ee... igaw daGuyaws vayuwein bisap. E, kuninuways tabgubag ansinap, ikapatul, igaw kweis beikweis wuwal waseg, wankuyeim bulbweilim beikweis kweis, mo bita̱yoy kan singay avakaein.

8 Bitawtoun amisinap, kwapatuls, peinan nuwanaw daGuyaws bisap.

9 Awoum kuvtokays livan simsimiyas wasigeis. Kukin bukuvtok livan soum, daGuyaws mo bikamta̱nim yak. Takaleiwag towen igaw wakoukwed nises; nuwanaw bisap.

10 Sigwey, kuninuways tasiyas palopit, kweiboug nikawes daGuyaws anilivan, abes singay igeg, tage ikaptules-wan. Kukin bukusesus ma̱wan, igaw mo bukumwa̱saws. Kweiboug Youb ma̱wan, a̱ban singay igeg, tage isesun-wan, Yowbad ikalin nuwan, wankuyeim mo isiwyoub avakaein. Yowbad nuwanen wasigeis ya̱kids singay avakaein.

12 Sigwey yakamiy, livan towen kuvna̱ses beibwein, awoum kutabdabods; awoum kutabdabods kal yagan waseg, walba̱lab o watinow; awoum. Magat bukutam, misinaka kulana, “Ee”; magat bukupiyev, kulana, “Nag”. Kukin kweitan livan bukusen mo beivag sinap kalbaleb, o Yowbad bikatimop sinap towen.

13 Kal yak a̱bam igeg, kadiloka kunitoug Yowbad waseg. Kal yak amnam ibwein, kadiloka kukwanuwel, kuyakawen Yowbad.

14 Kal yak bukukwatoun, kadiloka kudawes tasiyas mituwa̱vek tayekelesiys bimeis binitougs silma̱nim, bisenas tagon wa̱woum, daGuyaws yagan waseg.

15 Magat bukusimounids waseg Yowbad, o bukunitougs takatoun silma̱nin, daGuyaws mo bikatinob gamag towen, ankatoun mo beibwein. O magat ansinap kalbaleb, daGuyaws biwid, beikous.

16 E, kukwa̱mats amisinap kalbaleb, kulavewas, kunitougs pines simiyas, mo bukubweins.

Kukin kal tadidumwal binitoug Yowbad waseg, Yowbad mo bitawtoun youd towen silma̱nin.

17 Ilaytiy kweiboug gimgilitoun ma̱wana ya̱kids, itawtoun inanitoug Yowbad waseg va̱gan nag beikweis kweis, Yowbad mo isilbwed kweis. Ta-ikweis kweis kweitoun bweilim, kweinim katanok tibukon. Makava ka̱las.

18 Ikous, Ilaytiy mo initoug vayuwein, e, mo ikweis kweis, pwepway ivag anagin.

19 Sigwey yakamiy, kukin soum tayekelesiy teitan, ansinap bwein, mo bipiyev sinap mounid, wankuyeim mo bukukidumwal, va̱gan takalbaleb towen bipiyev sinap yaweid. E, kuninuways, bukukidumwal gamag towen bo bukwatinob kululuwan; nag biyageg; nag. Peinan Yowbad biwid ansinap; e, youd babaw kalbaleb biwid beikous.